Эльвида, Энвер Абибулла


Истидатлы зенаатдашымыз, чокъ бильгили, хусусан, миллий тарих, миллий эдебиятымыз боюнджа темелли тасиль саиби, сиясий меселелерни анълагъан, сербест журналистика саасында мувафакъиетлер эльде эткен, «Къырым»нынъ дикъкъатлы окъуйыджысы, самимий досту ве тенкъитчиси, ватанпервер инсан

Энвер бей Абибулла

вефат эткени мунасебетинен онынъ анасы – Гульнар ханымгъа, агъасына, бутюн сой-акърабаларына терен тазие билдиремиз, тюкенмез сабыр ве баш сагълыгъы тилеймиз.

Энвер къардашымыз Алланынъ рахметинде булунсын.

«Къырым» ве «Авдет»нинъ хадимлери.

Ашагъыда онынъ эки сой татасы, белли оджа, джемаатчы Энисе ханымнынъ кедерли эльвиди языларыны дердж этемиз.

Энвер Эльдар огълу Абибулла 1986 сенеси февральнинъ 5-де Озьбекистанда Самаркъанд шеэринде догъды. Анасы бала экими – Гульнар, бабасы – Эльдар Абибуллаев, техникумда оджа эди. Энвернинъ къартбабасы Багъчасарай районы Эфенди коюнден, Аджы Абибулла эфендининъ торуны эди.

1997 сенеси Энвернинъ къорантасы Ана-Ватан Къырымгъа къайтып келе ве Акъмесджит районы Сарайлы-Къят (Мирное) коюнде ерлеше. Мындаки мектепни битирген сонъ, о, Къырым муэндислик ве педагогика университети къырымтатар ве тюрк филологиясы факультетине окъумагъа кире оны мувафакъиетнен битире.

Окъув йылларында къырымтатар эдебиятынен пек меракълана, чокъ окъуй ве студентлик девринде къартдедеси ве Абляким Ильмий агъа-къардаш олгъаныны, догъмуш Ильмий дайысы да языджымызнынъ адыны ташыгъаныны огрене. Оджаларгъа пек чокъ суаль берген талеберден эди.

Университетни битирген сонъ журналистиканен пек меракълана. Qırım Haber Ajansı-нда мухбир, сонъра даа чешит медиа платформаларында чалышты. Журналистика онынъ яшайышына темелли кирген эди. «Qırım», «Янъы дюнья», «Авдет», «Голос Крыма» неширлеримиз даима иш масасында эдилер. Дюнья хаберлерини эр кунь джиддий талиль эткен мухбир эди.

2021 сенесининъ сонъунда ковид оларнынъ аилесинде де чагъырылмагъан «мусафир» олды. Энвер, онъа аит исрарлыгъынен, экимлернен дефаларджа корюшип, меслеатлашып, бабасыны, анасыны, агъасыны ве озюни хастаханеге ерлештирди.

2022 сенеси январьнинъ 5-де бабасы Эльдар Абибуллаев бу хасталыкъны баш эталмайып, фаний дюньямызны терк этти. Январьнинъ 12-де исе Энверимизнинъ юреги токътады.

Энвер къорантасыны, сой-сопуны, достларыны, миллетини, журналистиканы пек севе эди. Биз де сени пек севемиз. Эбедий дюньяда раат ол, къардашым. Бойле зиялы инсанларымыз гъает эрте кеткенлерине пек языкъ. Ёкълугъынъ пек дуюладжакъ, чюнки даа чокъ япыладжакъ ишлеринъ бар эди…

Эльвида, Энвер къардашым. Аллах рахмет эйлесин.

Энисе Абибулла.

ФБ саифесинден.

Предыдущая Крупный калибр начеку: возле оккупированного Крыма ВСУ провели учения – мощное видео
Следующая Reuters: Россия переместила запасы крови и медоборудования к границе Украины

Нет комментариев

Комментировать

Ваш адрес email не будет опубликован.